حد يعرف مين الى بنى خيمة الاجتماع؟
لأ مقصدش موسى
مين الى بنى الخيمة؟مين الى جهز الجلود و النحاس و الخشب و نقش الكتابة و عمل كل الاعمال دى؟
حد يعرف اسمه ؟
لاحظوا ان شعب اسرائيل كان فى مصر بيعمل اللبن بس ، يعنى يدوهم تبن و طين يخلطوهم و يعجنوهم يبقوا طوب ، هى دى شغلتهم
مكانوش يعرفوا حاجة عن الحرف و الصناعات التانية ، و لما ربنا كلف موسى بعمل الخيمة ده كان صعب جدا لان اولا ربنا طالب مقاسات بالظبط ( لان معظمها رموز ) ، و شكل معين و خامات محددة و كمان كان مطلوب ان الخيمة بكل حجمها ده تبقى قابلة للفك والتركيب عشان الارتحال و دى بالمناسبة مش حاجة سهلة بالمرة
و بعدين ربنا يقول لموسى و هو بيشرحله الخيمة :" انظر :قد دعوت بصلئيل بن حور من سبط يهوذا باسمه و ملأته من روح الله بالحكمة والفهم والمعرفة و كل صنعة لاختراع مخترعات ليعمل فى الذهب و الفضة و النحاس و نقش الحجارة للترصيع و نجارة الخشب ليعمل فى كل صنعة "
فموسى لما يجى يكلم الشعب و يوصف لهم الخيمة يلاقيهم مش فاهمين حاجة ، فيطمنهم و يقول لهم نفس الكلام كأنه بيطمنهم ، متخافوش الراجل ده هيقدر يعمل كل الكلام العجيب ده فعلا
طب اشمعنى بصلئيل يعنى؟؟؟
الكتاب مقالش اشمعنى الراجل ده ربنا اختاره
لكن خلينا نشوف هو عمل ايه ، الناس جمعوا الخامات الكتيرة جدا دى و ادوهاله ، فهو عمل كل الشغل العجيب : دباغة و خراطة و خياطة و قياس و سبك و نقش و تطريز ، شغل على الخشب و الجلد و الاحجار و القماش و النحاس و الحديد ، و نفذ الخيمة بكل التفاصيل الى ربنا طلبها بالظبط ، لدرجة ان سليمان الحكيم بعد سنين كتيرة جدا يقول الكتاب انه اصعد محرقات على مذبح النحاس الذى عمله بصلئيل بن حور و كأن الكتاب معتبر ان المذبح لازم يذكر باسم بصلئيل
طب تعرفوا بصلئيل الى عمل كل ده قال كام خطبة للشعب عشان يشرحلهم انجازاته ؟
و لا كلمة!
و لا حرف اتذكر فى الكتاب انه قاله !!
و لا حتى " أنا مين دى حقارتى و الخدمة دى بتاعة ربنا و انا صغير و مستاهلش " و الكلام بتاعنا الى فاكرينه تواضع و احنا بنستفز الناس بيه عشان تمدحنا !!!
طب لما خلصت الخيمة ؟؟؟
اختفى تماما!!!
و لا كرموه و عملو له حفلة و لا ندهو اسمه و ادوله درع الخيمة و لا حتى حد شكره و نده اسمه فى الميكرفون !!!
طب و هو؟
ولا فرقت معاه ، اختفى بهدووووووء .....
هو اتكلف بمهمة نفذها بكل امانة و دقة وبعدين اختفى
عرفتوا بقى اشمعنى بصلئيل بن حور الى ربنا اختاره للمهمة الصعبة دى ؟؟؟